網友狂踩演技到外表 「復仇者聯盟」親讀mean爆留言得啖笑

《復仇者聯盟3：無限之戰》(Avengers：Infinity War)大受歡迎，開畫7日累積票房達8,600萬，已經打入香港史上10大最高票房榜No. 10 ，可能大家身邊都有人討論劇情，戲中有哪些彩蛋，或者電影精唔精彩，近日，一班「復仇者聯盟」演員作客清談節目「Jimmy Kimmel Live」宣傳新戲，其中一個環節就請他們親自讀出網友「mean到爆」的留言，究竟他們會有甚麼反應？

有網友竟然留言說：「點解都無人話湯赫度斯頓(Tom Hiddleston)真係好醜樣架！」其實「邪神」湯赫度斯頓素來有「性感男神」的美譽，睇到網友話自己醜，湯赫度斯頓即時眼神死兼口啞啞。

受害者又點止「邪神」，「寒冬戰士」施巴斯坦史丹(Sebastian Stan)亦被網友問：「點解咁多人鍾意施巴斯坦史丹？佢睇落好似舊薯仔囉！」cool爆的「寒冬戰士」竟然似薯仔？真係令人搲晒頭，施巴斯坦史丹聽完都偏嘴。

亦有網友更形容「飛隼」安東尼麥奇(Anthony Mackie)、「戰鬥機器」當哲度(Don Cheadle)似昆蟲，而「神盾局長」森姆積遜(Samuel L. Jackson)長相竟似陸龜，雖然唔想承認，但又確實有幾分似。

更加mean的留言都有，因為網友除了攻擊演員的樣貌，連手指都唔放過，「緋紅女巫」伊莉莎白奧爾森(Elizabeth Olsen)就被網友話她的手指很奇怪，到底有幾奇怪？伊莉莎白奧爾森即席示範她的手指公能夠向後翻！

至於針對演技方面的留言，「奇異博士」班尼迪甘巴貝治(Benedict Cumberbatch)就被網友批評：「班尼迪甘巴貝治成日都好似睇落對臭蝦有過敏反應咁。」這句留言就點中班尼迪甘巴貝治的笑穴。

同樣被針對演技，「美國隊長」基斯伊雲斯(Chris Evans)被指：「基斯伊雲斯應該係一位好演員，不過佢演美國隊長真係爛透了！」「美國隊長」睇完亦被點中笑穴。

有網友就攻擊一向予人小朋友感覺的「蜘蛛俠」湯賀蘭(Tom Holland)，說：「我肯定湯賀蘭實係嗰啲飛機降落時會拍晒手掌嘅白人啦！」湯賀蘭表示無言以對，惟有一笑置之。

要睇晒全部留言，心臟弱啲都負荷唔到！

資料來源：ulifestyle

-----------------------------------------------------------------------------------

歡迎支持長崎涼美Facebook page (http://www.facebook.com/Nagasakijetso) ，留意我最新及至潮生活小知識！

假如你地有任何折扣優惠、得意有趣相片、開心大發現、生活健康資訊等，記得些牙到Facebook inbox，分享比我啊～🌸ありがとう🌸〜